1. Introdución
Neste apartado facilitarase o acceso ás distintas publicacións sobre planificación responsable de enerxías renovables.
2. Publicacións
2.1 Renovables responsables
Xornadas organizadas por SEO/ Birdlife e CSIC en maio de 2021.
2.2 Como conciliar o despregamento das renovables coa biodiversidade e o territorio
Informe elaborado por Instituto Internacional de Dereito e Medio Ambiente ( IIDMA) en xuño de 2021. Propón introducir no ordenamento xurídico os criterios para que unha instalación eólica ou fotovoltaica sexa considerada de gran escala así como crear Oficinas de Localización de Enerxías Renovables. Tamén recomenda garantir localizacións ambientalmente responsables para os proxectos enerxéticos, modificar o mecanismo de poxas de renovables, evitar o fraccionamento ilegal de parques e plantas polos promotores ou fomentar unha maior análise crítica por parte da Administración.
2.3 MITECO- SECEMU, Proposta de directrices para a avaliación e corrección da mortalidade de quirópteros en parques eólicos.
Unha das principais causas de mortalidade non natural dos quirópteros é a producida polos aeroxeradores (O’ Shea et al. 2016, Hayes et al. 2019). Considerando a bioloxía das especies deste grupo taxonómico, as mortalidades detectadas por esta causa poderían estar a poñer en risco a viabilidade de poboacións dalgunhas especies de quirópteros. Neste contexto, é importante destacar que a totalidade das especies españolas de quirópteros (32) atópense na Listaxe de Especies en Réxime de Protección Especial (Real Decreto 139/2011, do 4 de febreiro) e 12 delas ademais están incluídas no Catálogo Español de Especies Ameazadas.
Por tanto, os procedementos de avaliación de impacto ambiental deben considerar de maneira específica este impacto, baseándose no mellor coñecemento científico dispoñible, para a elaboración dos correspondentes estudos de impacto ambiental, a implementación das medidas preventivas e correctoras e a proposta das indicacións para que o seguimento ambiental logre cumprir os obxectivos para os que se estableceu.
Neste sentido, esta guía elaborada pola Dirección Xeral de Biodiversidade, Bosques e Desertificación do Ministerio para a Transición Ecolóxica e o Reto Demográfico, en colaboración coa Asociación para o Estudo e a Conservación dos Morcegos ( SECEMU), realiza unha proposta metodolóxica para a correcta avaliación, corrección e seguimento dos impactos das instalacións eólicas sobre este grupo. Desta maneira espérase poder compatibilizar a conservación das poboacións españolas de morcegos coa descarbonización da produción de enerxía e a redución da dependencia enerxética.
